Их Британийн угсаа залгамжлах ханхүү Уильямын гэргий гүнж Кэйт Миддлтоны цээж нүцгэн зургийг нийтэлсэн Францын сэтгүүлд холбогдох хэргийн шүүх хурал өчигдөр болжээ.

Улмаар шүүх бүрэлдэхүүн гүнжийн зургийг зөвшөөрөлгүйгээр тэргүүн нүүртээ нийтэлсэн сэтгүүлд 100 мянган еврогийн нөхөн олговрыг хунтайжийн гэр бүлд төлөх шийтгэл ногдуулсан байна. Мөн тус сэтгүүлийн эрхлэгч болон хэвлэсэн компанийн гүйцэтгэх захиралд тус бүр 45 мянга еврогийн торгууль ногдуулжээ.

Хэргийг эргэн сануулбал, Францын “Closer” гэх сэтгүүл 2012 оны есдүгээр сарын дугаартаа гүнж Кэйт Миддлтоны наран шарлагын газарт байхад нь авсан зургийг нийтэлсэн юм. Гэвч, Британийн тал уг зургийг хурцаар шүүмжилж, сэтгүүлийг шүүхэд өгөөд байв. Тус хэргийн анхан шатны шүүх хурал өнгөрсөн тавдугаар сарын 2-нд болсон юм. Тухайн үед хунтайжийн гэр бүл 1.5 сая еврог нэхэмжилсэн байдаг.