Монгол Улсын Ерөнхийлөгч Х.Баттулга ОХУ-ын Ерөнхийлөгч В.Путины ивээл дор зохион байгуулж буй Владивостокийн эдийн засгийн чуулга уулзалтад оролцохоор ОХУ-ыг зорилоо. Тэрбээр, чуулга уулзалтаас гадна ОХУ-ын Ерөнхийлөгч болон бусад албаны хүмүүстэй уулзаж хоёр улсын хамтын ажиллагааны талаар хамтын ажиллагааны шинэ төслүүдэд гарын үсэг зурах аж.

Мөн энэхүү чуулга уулзалтад оролцохоор ирсэн бусад улсын төр засгийн тэргүүнүүдтэй ч уулзалт товлоод байгаа талаар Ерөнхийлөгчийн хэвлэлийн албанаас мэдээллээ.

Ерөнхийлөгчийн бүрэн эрхээ хэрэгжүүлж эхэлснээс хойш анх удаа албан ёсны гадаад айлчлалаа хойд хөршөөс эхлүүлж буй Х.Баттулга Ерөнхийлөгчийн айлчлалын бүрэлдэхүүнд нэг ч УИХ-ын гишүүн багтаагүй аж.

Хэдийгээр айлчлалын бүрэлдэхүүнд улс төрийн хоёр намын төлөөллөөс гишүүд болон Засгийн газрын зарим сайд багтсан байсан ч энэ долоо хоногт Засгийн газрыг огцруулах эсэх асуудлыг УИХ-аар хэлэлцэх учраас ирц бүрэн байж энэ асуудлыг хэлэлцэх ёстой гэж үзсэн бололтой. УИХ-ын Тамгын газарт Ерөнхийлөгчийн тамгын газрын дарга З.Энхболд тийм утга бүхий албан бичиг хүргүүлсэн гэх мэдээлэл байна.