Авлигатай тэмцэх газраас өнөөдөр 11.00 цагт хэвлэлийн бага хурал зарлаж, цаг үеийн асуудлаар мэдээлэл хийлээ. АТГ-аас сүүлийн үед хийж хэрэгжүүлж буй ажлуудын талаар албаныхан товч мэдээлэл өгснийхөө дараа сэтгүүлчдэд олны анхаарал татсан зарим асуудлаар тайлбар өгсөн юм.

Тухайлбал, Шадар сайд У.Хүрэлсүхийг тагнаж, чагнасан гэх хэргийн мөрдлөгийн явцын талаар мэдээллээ.

Анх шадар сайдыг хоёр сарын турш тагнасан Ч.Батболд гэгчийн яриа олон нийтийн сүлжээнд цацагдаж, үүний дараа хуулийнхан түүнийг болон иргэн А, Ж нарыг баривчилсан юм. Түүнчлэн, шадар сайдын дүү У.Отгонбаярыг ч мөн шалгаж байгаа гэсэн мэдээлэл гарсан.

 Тэгвэл өнөөдөр болсон хэвлэлийн хурлын үеэр АТГ-аас “Шадар сайд У.Хүрэлсүх зохион байгууллалттайгаар өөрийгөө тагнаж, чагнаж, мөрдүүлсэн нь тогтоогдсон тул яллагдагчаар татах хүсэлтээ прокурорын байгууллагад хүргүүлсэн” хэмээн мэдээллээ.