Дэлхийн хамгийн өрсөлдөөнтэй лиг болох Английн премьер лигийн 2017-2018 оны улирал өнөө шөнө “хөшиг”-өө нээх гэж байна. Улаанбаатарын цагаар 02:45 цагаас “Арсенал” клуб талбайдаа “Лестер”-ийг хүлээж авснаар премьер лигийн урт улирал эхлэх юм.

“Арсенал”-ын гараанд өнөөдөр урд шугаманд Александр Лаказетте гарахаар болсон байна. Харин “Лестер”-ээс Ихеаначо урд шугамд Вардигийн хамт гарах аж. Хоёр баг сүүлийн 6 удаа хоорондоо учраа таарахад “Арсенал” 4 хожиж, хоёрт нь тэнцжээ. Хамгийн сүүлд өнгөрсөн дөрөвдүгээр сарын 26-нд тулж, “Арсенал” 1:0-ээр буулгаж авсан юм.

Хоёр багтай холбоотой статистик  

Арсенал

-“Арсенал” клуб “Лестер”-тэй хийсэн премьер лигийн сүүлийн 21 тоглолтдоо ганц ч хожигдоогүй

-Буучид сүүлийн 7 удаагийн нээлтийн тоглолтод ердөө ганцхан хожиж, гурав хожигдсон. Харин гурван удаад нь тэнцээд байна.

-Өнөө шөнө “Арсенал”-ын төвийн довтлогчоор гарах Лаказетте сүүлийн дөрвөн улиралд Францын Лиг-1-т 91 гоол оруулсан.

-Алексис Санчес өнгөрсөн улиралд премьер лигт гоол болон дамжуулалтынхаа тоог хоёр оронтой тоонд хүргэсэн цорын ганц тоглогч. Тэрбээр 24 гоол оруулж, 10 оновчтой дамжуулалт өгсөн.

Лестер

-Английн дээд лигийн 129 жилийн түүхэнд анх удаа нээлтийн тоглолт баасан гарагт эхлэх гэж байгаа нь энэ “тулаан” юм.

-“Лестер” сүүлийн 8 жилийн нээлтийн тоглолтод ердөө ганц л удаа хожсон. Дөрөвт нь тэнцэж, гурав хожигдсон. Тэд 2015 онд “Сандерланд”-ыг 4:2-оор хожиж байжээ.