“Багануур” ХК ой хээрийн түймэрт ажиллаж буй Онцгой байдлын алба хаагчдад зориулж, 36 сая төгрөгний бараа материал, хөдөлмөр хамгааллын хувцас хэрэглэл, бэлэн мөнгийг гардуулан өглөө. “Багануур” ХК-ийн гүйцэтгэх захирал Э.Номинчулуун  “Манай компани нийгмийн хариуцлагын хүрээнд тодорхой чиглэл үүрэгтэй ажиллаж байгаа. Энэ хүрээнд компанийн нийт уурхайчдын санаачилгаар  11.6 сая төгрөгийг бэлнээр, мөн  24.9 сая төгрөгний галд тэсвэртэй хөдөлмөр хамгааллын хувцас хэрэглэлийг ой хээрийн түймэртэй тэмцэх үйлсэд зориулан хандивлаж байна” гэлээ. 

Хандивын бараа материалд галд тэсвэртэй материалтай өмд цамц, бээлий, амны маск, гутал гэх мэт бараа материал багтсан байна.

Энэ сарын байдлаар улсын хэмжээнд 68 удаагийн ой, хээрийн түймэр гарч, 61337 га ой, хээрийн бүс шатсан гэх мэдээлэл байгаа юм. Түймрийг унтраахад Онцгой байдлын байгууллагаас 1071 албан хаагч, 87 автомашин, Зэвсэгт хүчнээс 461 алба хаагч, орон нутгаас 1358 иргэн дайчлагдан ажиллаж буй бөгөөд тэдэнд туслах, дэмжлэг үзүүлэх зорилгоор төрийн болон төрийн бус байгууллага, иргэд, аж ахуй нэгж байгууллагууд эд материалын болон бэлэн мөнгө хандивласаар байна.