Зураг дээрх өнгөт арьст бүсгүйг Иэша Эванс гэдэг. Тэрбээр АНУ-ын Луйзанна мужийн Батон Руж хотын цагдаагийн газрын гадна хуулийн байгууллагынхны өнгөт арьснуудын эсрэг хүчирхийллийг эсэргүүцсэн жагсаалын үеэр зэвсэглэсэн салаа цагдаагийнхны өмнөөс гартаа ганц ч зэвсэггүй сөрөн зогсож буй нь энэ.

Өмссөн цоохор даашинзнаасаа өөр зэвсэггүй сул дорой бүсгүй 2016 оны долдугаар сарын 5-нд хоёр цагаан арьст цагдаагийн алба хаагчид буудуулан амиа алдсан Алтон Стерлингийн үхэлтэй холбогдуулан Батон Руж хотод эсэргүүцлийн жагсаалд оролцохоор ирсэн байна. Алтон Стерлинг цагдаагийнхны хүчирхийлэлд өртөн амиа алдсан өнгөт арьстнуудын нэг байсан юм. Албаны тоон мэдээллээс үзвэл,  2016 онд 15-34 насны нийтдээ есөн өнгөт арьстан амиа алдсан байна.

Сувилагч мэргэжилтэй, таван настай хүүтэй Эванс бүсгүй энэхүү эсэргүүцлийн хөдөлгөөний үеэр баривчлагдсан гэдэг. Гэхдээ төд удалгүй суллагдсан юм. Ямартай ч, арьс өнгөөр ялгаварлан гадуурхах үзэл өнөө хэр АНУ-д оршсоор буйг эсэргүүцсэн жирийн нэгэн бүсгүйн  зураг дэлхийн хэвлэлийн шилдэг гэрэл зураг шалгаруулах “World press photo-2017” наадмын “цаг үеийн асуудал” төрөлд тэргүүн байр эзэлжээ. Зургийг  “Ройтерс” агентлагийн зурагчин Жонатан Бэкмэн 2016 оны долдугаар сарын 9-нд гэрэл зургийн хальснаа буулгасан байна.

Тэрбээр тухайн үеийн нөхцөл байдлын талаар ярихдаа “Би зам дээр цагдаа нарын эсрэг эсэргүүцлийн хөдөлгөөн өрнүүлж буй жагсагчдын зургийг аваад явж байлаа. Тэгэж явахдаа нэг бүсгүй зам дээр зогсч байхыг харсан. Тэр бүсгүй цагдаа нарын өмнө зогсоод, юу ч хэлээгүй, бас ямар нэг хөдөлгөөн хийгээгүй. Цагдаа нар түүнийг баривчлах нь ч тодорхой байсан” гэж ярьжээ.