Ерөнхийлөгчийн сонгуультай холбоотойгоор Нийслэлийн Засаг дарга бөгөөд Улаанбаатар хотын захирагч С.Батболд Сонгуулийн тухай хуулийг хэрэгжүүлэх талаар авах зарим арга хэмжээний тухай захирамж гаргаж, өнөөдрийн 00.00 цагаас 28-ны өдрийн 00.00 цаг хүртэл нийслэлийн нутаг дэвсгэрт архи, согтууруулах ундаа худалдах, түүгээр үйлчлэхийг түр хориглох шийдвэр гаргасан билээ.

Мөн нийтийг хамарсан үйл ажиллагаа явуулахыг хориглох заалттай учраас энэ сарын 25-нд болох байсан “Яг түүн шиг” шоуны хаалтын тоглолтыг цуцлаад байгаа юм.

Мөн их Жанжин Д.Сүхбаатарын талбайд ч нийтийг хамарсан үйл ажиллагаа, урлаг соёлын тоглолт явуулахгүй байхаар захирамждаа тусгажээ.

Ерөнхийлөгчийн сонгууль өгч буй энэ өдөр бүх нийтийн амралтын өдөр учраас дугаарын хязгааралт үйлчлэхгүй, мөн томоохон зах худалдааны төвүүд ч амарч байгаа учраас иргэн та Үндсэн хуулиар олгогдсон эрхээ эдэлж, төрийн тэргүүнээ сонгох түүхэн үүргээ гүйцэтгээрэй.

Харин сонгуулийн өдрөөр амардаггүй цагдаа хүчний байгууллага, эмч, эмнэлгийн байгууллагын ажилтнуудынхаа санал өгөх эрхийг тухайн байгууллага хангах учиртай билээ.