Засгийн газраас иргэдийг орон сууцжуулах зорилгоор орон сууцны ипотекийн зээлийн хөтөлбөрийг хэрэгжүүлж байгаа билээ. Эдийн засгийн хямралаас үүдэж энэхүү хөтөлбөрт улсын төсвөөс сар бүр олгодог санхүүжилт багассан ч иргэдэд зээлийг үргэлжлүүлэн олгож байгаа юм.

Тухайлбал, өнгөрсөн тавдугаар сард банкууд 1089 зээлдэгчид 67.8 тэрбум төгрөгийн ипотекийн зээл олгожээ. Одоогоор ипотекийн зээлийн үлдэгдэл 4143.2 тэрбум төгрөгт, нийт зээлдэгчдийн тоо 91.3 мянгад хүрчээ. Мөн орон нутаг дахь банкуудын ипотекийн зээлийн үлдэгдэл 930.0 тэрбум төгрөгт, зээлдэгчдийн тоо 28.8 мянгад хүрсэн байна. Харин ипотекийн зээлийн үлдэгдэлд чанаргүй зээлийн эзлэх хувь 1.9 хувьд хүрсэн байна. Энэ нь өмнөх сараас 0.1 нэгж хувиар өссөн үзүүлэлтэй байгаа ажээ.