Богдхан уулын дархан цаазат газрын Багатэнгэрийн амны хязгаарлалтын бүсэд “Зүүнбаян рефайнери” компани бургасыг ихээр сүйтгэж, байгаль орчинд хохирол учруулсан талаар өмнө бид мэдээлсэн. Тэгвэл энэхүү хууль бус үйлдэлтэй холбогдуулан БОАЖЯ-аас хариуцлага тооцож, “Зүүнбаян рефайнери” компанийн эрхийг цуцалжээ.

Тус компани нь Багатэнгэрийн амны хязгаарлалтын бүсэд 2008 оны наймдугаар сарын 22-ны өдрийн 283 тоот тушаалаар дөрвөн га газрыг аялал жуулчлалын зориулалтаар ашиглах эрхийг авчээ. Гэвч 2014 оноос хойш өнөөдрийг хүртэл нийт  хоёр га газрын бургасыг сүйтгэсэн байна. Холбогдох газраас удаа дараа зөрчлөө арилгах шаардлага хуудас өгсөн ч хэрэгжүүлээгүй ажээ. Тиймээс холбогдох яамнаас дээрх шийдвэрийг гаргасан байна.