Улаанбаатар хотод өчигдөр орсон борооны улмаас Нийслэлийн Онцгой байдлын газарт нийт 71 дуудлага иржээ. Тодруулбал, их хэмжээний усархаг бороо орсны улмаас орон сууц, барилгын зоорийн давхруудад их хэмжээний ус орсон, айл өрхийн гэр, хашаа усанд автсан тухай нийт 71 дуудлагыг Нийслэлийн Мэдээлэл, шуурхай удирдлагын төвд хүлээн авсан байна.

Дуудлагын дагуу ОБЕГ-ын харьяа Аврах тусгай анги, Нийслэлийн Аврах 105 анги, төвийн зургаан дүүргийн 11 анги, нийт 13 ангийн 179 алба хаагч, 30 техник хэрэгсэлтэйгээр иргэд, аж ахуй, нэгж байгууллагын аюулгүй байдлыг хангаж ажилласан талаар Онцгой байдлын газраас мэдэгдлээ.

Тухайлбал,  Баянгол дүүргийн IV  хороо 28, 29 дүгээр байрны автомашины гарааш усанд автсаныг дүүргийн Онцгой байдлын хэлтсийн алба хаагчид соруулж аюулгүй болгожээ. Мөн тус дүүргийн IV  хороо “Голден парк 2” хотхоны 301-р байрны автомашины гарааш усанд автсаныг нийслэлийн Аврах анги 105-ын алба хаагчид соруулж ажилласан байна.