Замын цагдаагийн албаны ЖШУХ-т өчигдөр нийт 321 дуудлага хүлээн авчээ. Үүнээс зам тээврийн ослын 224 дуудлага бүртгэгдсэн байна. Ослын улмаас гурван хүний амиа алдаж, 11 хүн хүнд, хөнгөн байдлаар гэмтсэн талаар Замын цагдаагийн албанаас мэдээллээ.

Тодруулбал, Баянзүрх дүүргийн нутгаар дамжин өнгөрөх уулын замын Сүүлт даваанд зам тээврийн осол гарч, нэг хүн амиа алдсан хэрэг гарчээ. Мөн Хөтөлийн замд явган зорчигч 53 настай Л-г мөргөж, амийг нь хохироосон хэрэг гарсан байна. Тиймээс Замын цагдаагийн албанаас согтуугаар тээврийн хэрэгсэл жолоодохгүй байхыг анхаарууллаа.

Түүнчлэн өчигдөрөөс эхлэн орсон борооны улмаас замын гадаргуу гулгаатай байгаа тул тээврийн хэрэгслийн хоорондын болон хажуугийн зайг баримтлах, хурдыг зөв тохируулах, явган зорчигч иргэд рүү санаатайгаар ус цацахгүй байж хөдөлгөөнд соёлтой байхыг сэрэмжлүүлж байна.