УИХ-ын дэд дарга Ц.Нямдорж парламентын суудалд удаан суусан, хашир туршлагатай улстөрч болоод ч тэр үү хааяахан бусаддаа “тоглоом, шоглоом”-оор зангарагтайхан үг дуулгачихдаг нэгэн. Түүний хэлж буй үг үнэний ортой ч чуулганы хуралдааны үеэр гишүүдийн нэр хүндийг унагаж, халдлаа хэмээн бусад гишүүд түүнд гомдол мэдүүлэх нь бий.

Гишүүдийн хэлсэнчилэн УИХ-ын дэд дарга Ц.Нямдорж заримдаа тун ч их хэтрүүлчихдэг. Өнөөдрийн чуулганы хуралдаанаар ч О.Баасанхүү гишүүнийг “шоглоод” авав. Учир нь өнөөдрийн хуралдаанд Үндсэн хуулийн Цэцийн гишүүнийг томилох эсэх асуудлыг хэлэлцсэн юм. Энэ үеэр О.Баасанхүү гишүүн хатуухан шүүмжлэл хэлсэн нь Ц.Нямдорж гишүүний эгдүүцлийг хүргэсэн бололтой. Ямартай ч эрхэм гишүүн “О.Баасанхүү гишүүнээ нөгөө эмээ сайн ууж бай. Өглөө болгон сайн ууж бай” хэмээн хэлээд авна лээ.