Баян-Өлгий аймаг дахь Цагдаагийн газраас “Хуулиа дээдэлье” ерөнхий үйл ажиллагааны хүрээнд сумдын Засаг даргын Тамгын газрын хууль, эрх зүйн мэргэжилтэн, аймгийн төвийн төрийн байгууллагуудын эрх бүхий алба хаагчдыг оролцуулан “Гэмт хэрэг, зөрчлөөс урьдчилан сэргийлэх, байгууллага, алба хаагчдын аюулгүй байдлыг хангах мэргэшүүлэх сургалт, зөвлөгөөн”-ийг зохион байгуулжээ.

Энэхүү сургалтад хамрагдсан 46 төрийн алба хаагчид Цагдаагийн албаны тухай хууль, Гэмт хэргээс урьдчилан сэргийлэх тухай хууль, Гэр бүлийн хүчирхийлэлтэй тэмцэх тухай хууль, Захиргааны хариуцлагын тухай хуульд орсон нэмэлт өөрчлөлт, Архидан согтуурахтай тэмцэх тухай хууль, Тамхины хяналтын тухай хууль тогтоомж, байгууллагын аюулгүй байдлыг хэрхэн хангах талаархи илтгэл тавьсан байна. Мөн сургалтад хамрагдсан албан хаагчдад гэрчилгээ гардуулсан аж.

Түүнчлэн тус аймгийн Онцгой байдал, Мэргэжлийн хяналтын газрын мэргэжилтнүүд гал түймрээс урьдчилан сэргийлэх, хүнсний аюулгүй байдлын талаар сургалт явуулсан.

Цаашид сургалтад хамрагдаж мэргэшсэн төрийн алба хаагчдаар дамжуулан иргэд, олон нийтэд хууль тогтоомжийг сурталчлан таниулах, гэмт хэргээс урьдчилан сэргийлэх, гэмт хэрэг, зөрчлийн шалтгаан нөхцөлийг арилгуулах ажлыг хэрэгжүүлэн ажиллах юм байна.