Орос улс өнөөдөр Аугаа их Эх орны ялалтын баярын өдрийг тэмдэглэнэ. Одоогоос 72 жилийн тэртээх 1945 оны тавдугаар сарын 9-ний энэ өдөр Дэлхийн II дайныг өдөөгч Гитлерийн Герман Берлин хотод үг дуугүй бууж өгөх гэрээнд гарын үсэг зурснаар энэ өдрийг албан ёсоор Зөвлөлтийн ард түмний ялалтын баяр болгон тэмдэглэх болсон юм.

Энэ өдөр бол ганц зөвлөлт ч гэлтгүй Дэлхийн II дайнд зовж, зүдэрсэн бүхий л ард түмний ялалтын баяр билээ. Зөвлөлтийн ард түмэнтэй зүрх сэтгэлээрээ нэг байж, цэргүүдэд морь, хүнс, бээлий гээд бүх л зүйлээр тусалж, мөр зэрэгцэн тулалдаж явсан Монгол Улсын хувьд ч энэ өдөр яах аргагүй түүхэн тэмдэглэлт өдөр.

Тиймдээ ч жил бүр бид Орос ах нартайгаа хамт энэ өдрийг ёслол төгөлдөр тэмдэглэдэг билээ. Өнөөдөр уламжлал ёсоор Батлан хамгаалах яамны удирдлагууд болон төр засгийн удирдлагууд Маршал Г.К. Жуковын хөшөөнд цэцэг өргөх аж.

Мөн Зайсан толгой дахь Зөвлөлтийн дайчдын хөшөөнд цэцэг өргөхөөс гадна Батлан хамгаалах Их сургуульд ч мөн Ялалтын баяртай холбоотой хүндэтгэлийн үйл ажиллагаа болох юм байна. Мөн энэхүү түүхэн үйл явдалд гар бие оролцож явсан хоёр ахмад дайчдад Батлан хамгаалах яамны удирдлагууд 15.00 цагаас хүндэтгэл үзүүлэхээр болжээ.