Хааяахан гэр бүл, найз нөхөдтэйгөө тав тухтай тохилог ресторанд орох гэхээр заавал ч үгүй Япон, Солонгос, Хятад, Английн сүлжээ ресторанд орж таардаг. Энэ нь ч аргагүй. Нийслэлийн гудамж талбайд тав алхаад л Солонгос, Япон улсын сүлжээ рестораны үүдэнд очдог учраас тэр. Үүнээс болж “Яагаад манай улсад ийм их гадаадын сүлжээ ресторан байдаг юм бэ” хэмээн бодож байсан хүн олон биз. Нэг үгээр хэлбэл, манай улсын хоол, хүнсний үйлчилгээний салбарын орон зайг гадаадын сүлжээ ресторанууд эзэлсэн гэдэг нь хэн бүхний нүдэнд илхэн. Тиймээс ч амралтын өдрөө гэр бүлээрээ ая тухтай өнгөрүүлэх сонирхолтой монгол хүн бүр үндэсний сүлжээ рестораныг эрэлхийлдэг гэхэд хэн ч маргахгүй биз ээ. Тэгвэл ард түмнийхээ энэхүү хүсэлд нийцүүлэн “MANDU HOUSE” нэртэй Монголын анхны сүлжээ ресторан нээлтээ хийлээ. 

 

Энэхүү рестораныг байгуулах төсөл нэг жилийн өмнө эхэлсэн бөгөөд анхны салбараа эх орондоо нээж байгаа нь энэ. Монголын нэрийг дэлхийд гаргах үндэсний сүлжээ рестораны нээлтэд “Сэлэнгэ пресс” компанийн захирал М.Болд, Шадар сайдын Ажлын албаны дарга н.Энх-Амгалан, Нийслэлийн мэргэжлийн хяналтын газрын дэд дарга С.Даваасүрэн, “Мандү Хаус” компанийн гүйцэтгэх захирал, үүсгэн байгуулагч П.Мөнхчулуун  болон “Хар сарнай” хамтлагийн дуучин Амраа, “Мотив” хамтлаг, дуучин A cool зэрэг уран бүтээлчид оролцлоо. Үндэсний сүлжээ рестораныг нээж, “Мандү Хуас” компанийн гүйцэтгэх захирал, үүсгэн байгуулагч П.Мөнхчулуун “Монголын үндэсний үйлчилгээний хамгийн анхны брэнд өнөөдөр нээгдлээ.

 

Дотоодын зах зээлийг гадаадын франчайзингийн зах зээлээс хамгаалах, гадаадын зах зээлд үндэсний брэндийг гаргах зорилгоор энэхүү төслийг анх эхлүүлсэн түүхтэй. Бидний төсөл нэг жилийн хугацаанд үргэлжилж, энэ өдөр албан ёсоор нээлтээ хийж байгаад баяртай байна. 

 

 

 

 

Манай брэнд дотоодын аж ахуйн нэгжийн бүх бүтээгдэхүүнийг үнийн дүндээ шингээж өгснөөрөө давуу талтай юм. Нэг үгээр хэлбэл, 100 хувь дотоодын бүтээгдэхүүнийг ашиглана гэсэн үг. Манай нэрийн хоолонд орж буй гурил, мах, давс, амтлагч гээд бүх материалыг дотоодын аж ахуйн нэгж ханган нийлүүлж байгаа. Энэ брэнд гадаадын зах зээлд амжилттай байвал дотоодод үйлдвэрлэсэн “Алтан тариа” гурил, “Мах маркет” компанийн мах болон Увс аймгийн нэрийн давс зэрэг үндэсний олон компани гадны зах зээлд бүтээгдэхүүнээ амжилттай байршуулж чадах юм” гэв. Мөн энэ үеэр төслийн санаачлагчид “Мандү хаус” сүлжээ ресторан нь Азийн уламжлалт хоолыг орчин үеийн түргэн хоолны стандартад нийцүүлэн тав тухтай орчин, түргэн шуурхай соёлтой үйлчилгээтэй хослуулсан үндэсний франчайзингийн брэнд гэдгийг онцолж байлаа.

 

Энэхүү сүлжээ ресторан нь Азийн уламжлалт хоолыг орчин үеийн үйлчилгээний стандартад нийцүүлэн гаргаж, дэлхий нийтэд санал болгож буй Монголын үйлчилгээний брэнд юм. “Мандү Хаус” брэнд Монгол Улсад боловсруулсан мах, гурил, давс, хүнсний ногоо зэрэг органик түүхий эдийг ашиглан Азийн уламжлалт хоолыг өөрийн кофе шопын загвартай хослуулан орчин үеийн хэв маяг, үйлчилгээ стандартад нийцүүлэн гаргасан үйлчилгээний брэнд аж. Тус төслийг хэрэгжүүлэхийн тулд нэг жилийн хугацаанд хэрэглэгчдийн дунд судалгаа хийжээ. Мөн тэд цаашид үйл ажиллагаагаа өргөжүүлэн Монгол Улсад 10 орчим салбар байгуулахаар төлөвлөж байгаа гэнэ. Мөн ирэх зургадугаар сард Казахстан болон Өвөрмонголд сүлжээ рестораны салбараа байгуулах талаар судалж байгаа аж. Монголын брэнд “Мандү Хаус” сүлжээ ресторанд зочилсноор таван төрлийн бууз, 12 төрлийн хачир, татмал гурилтай шөл, 30-40 төрлийн кофе, 12 төрлийн десерт, шэйк, латтенаас сонгон үйлчлүүлэх боломжтой.

 

Тодруулбал, 5500 төгрөгийн сетэд нь таван бууз, гурван хачир, ясны шөл багтахаас гадна ногоон цай болон пепси ундаанаас сонгон авах боломжтой аж. Дашрамд сонирхуулахад, “MANDU HOUSE” түргэн хоолны сүлжээ рестораны үүсгэн байгуулагчид Дэлхийн топ 500 франчайзинг брэндийн жагсаалтад багтах зорилго тавин ажиллаж  байна.