Сангийн сайд Б.Чойжилсүрэн нэр бүхий хэвлэл мэдээллийн байгууллага болон сэтгүүлчдийг цагдаад шалгуулахаар өгчээ. Энэ талаарх мэдээллийг өнөөдөр гишүүний өмгөөлөгчид “MNBC” телевизийн байранд 13.00 цагаас мэдээлэл хийх аж.

Б.Чойжилсүрэн гишүүнтэй холбоотой сүүлийн үеийн мэдээлэл гэвэл Тост, Тосонбумбын нуруутай холбогдон яригдаж буй бөгөөд хэвлэл мэдээллийн хэрэгслээр түүнийг тусгай хамгаалалттай энэ газар нутагт орд эзэмшиж, улмаар түүнийгээ алдахгүйн тулд төрийн хуулийг уландаа гишгэж байна гэх мэдээлэл гарч байгаа юм

“Мангасын аман дахь Тосон бумбын нуруу” гэх материалд эрхэм гишүүнтэй холбоотой нэлээд ноцтой баримтууд цацагдсан бөгөөд энэ асуудлаар сэтгүүлчийг шүүхэд өгсөн бололтой. УИХ-аар энэ долоо хоногт Зөрчлийн тухай хуулийн төслийг хэлэлцэх бөгөөд хэрвээ энэ хууль батлагдвал улстөрчийн ноцтой, нотой баримтыг гаргаж тавьсан сэтгүүлч хүн гүтгэсэн гэх зүйл заалтаар хоёр сая төгрөг, албан байгууллаг нь 20 сая төгрөгөөр торгууль төлөх учиртай. Гэвч хууль батлагдаагүй учраас энэ удаад эрхэм гишүүн сэтгүүлчдэд Эрүүгийн хэрэг үүсгүүлэх бололтой.