“Хайрын хос дуучин” хэмээн алдаршсан дуучин Анхаа, Халиун нарыг танихгүй хүн үгүй. “Эхнэрийн урхи”, “Хос хайр” зэрэг олон ангит киноны дууг монгол хэлээр дуулан үзэгчдийг хэсэгтээ л байлдан дагуулсан ч урлагийн карьераа түр завсарлаад байсан билээ.

Тэгвэл дуучин бүсгүй “Боловсрол” суваг телевизийн “Яг түүн шиг” шоунд оролцон шүүгчид болон үзэгчдээс магтаалын үгийг харамгүй сонсож буй. Тодруулбал, тус нэвтрүүлгийн хоёр дахь дугаарт хайрын дууч С.Сэрчмааг дуурайсан нь үзэгчдээс “Яг түүн шиг” байж чадлаа хэмээх үнэлгээ авч дугаарын ялагч болсон.

Мөн тав дахь удаагийн дугаарт  “Тав дахь элемент” киноны DIVA PLAVALAGUNA-г тайзнаа амилуулсан бүсгүй шүүгчдээс өндөр үнэлгээ авсан бөгөөд тэр хэрээр чадварлаг уран бүтээлч гэдгээ харуулсан билээ.

Энэ үеэр дуучин бүсгүй уран бүтээлийнхээ ажилд шамдан орж, шүтэн бишрэгчидтэйгээ шинэ уран бүтээлээр уулзана хэмээн амласан юм.  Ямартай ч дуучин бүсгүй ганцаараа уран бүтээлийн карьераа үргэлжлүүлэн шинэхэн уран бүтээлээр уулзах нь бололтой.