“Ард түмний онц түр зөвлөл” төрийн бус байгууллагаас “Хуулиа дээдэлье, оффшорчдыг шалга” жагсаалыг өнгөрсөн бямба гарагт Сүхбаатарын талбайд зохион байгуулсан билээ.

Тус жагсаалд оролцсон иргэд үргэлжлүүлэн суулт зарлаж байгаа юм. Бямба гарагт  жагсаалаар эхэлсэн энэхүү суултыг УИХ-ын гишүүн С.Жавхлан, экс гишүүн С.Ганбаатар, Ахмадын чөлөөт холбооны тэргүүн Г.Баасан нар дэмжиж оролцсон. Мөн яруу найрагч Т.Галсан, МАХН-ын дарга Н.Энхбаяр нар ч энэ жагсаалыг дэмжиж буйгаа мэдэгдсэн юм.

 Тэгвэл өнөөдөр суулт зарласан иргэдийн нэг болох 23 настай залуугийн биеийн байдал муудаж, цагдаагийн байгууллагын тусламжтайгаар эмнэлэгт хүргэгджээ.  Хуулийн дагуу жагсаал, цуглаан 16:40 цагт тарсан ч хэсэг иргэд суулт зарлаж, зохих зөвшөөрөлгүйгээр өнөөдрийг хүртэл суултыг үргэлжлүүлээд байгаа ажээ. Өнөөдрийн байдлаар суулт гурав дахь өдрөө үргэлжилж байгаа юм.