Замын цагдаагийн албаны ЖШУХ-т өнгөрсөн амралтын өдрүүдэд нийт 618 дуудлага, мэдээ мэдээлэл ирсэн байна. Үүнээс зам тээврийн ослын 466 дуудлага бүртгэгдсэн бөгөөд ослын улмаас нэг хүний амиа алдаж, 20 хүн хүнд, хөнгөн байдлаар гэмтжээ. Зам тээврийн ослын улмаас бэртсэн иргэдийн найм нь хүүхэд байсан талаар Замын цагдаагийн албанаас анхаарууллаа.

Тодруулбал, СХД-ийн нутаг Москвагийн гудамж “Lux oil” ХХК-ны урд замд T.Prius-20 маркийн автомашины жолооч Г нь согтууруулах ундааны зүйл хэрэглэсэн үедээ тээврийн хэрэгсэл жолоодсоны улмаас онхолдож 10 сартай Г амиа алдаж, хоёр хүн гэмтсэн аж. Тус хэргийг Замын цагдаагийн албаны гэмт хэрэгтэй тэмцэх хэлтэст шалгаж байна.

Мөн БЗД-ийн нутаг Хонхорын зам “Бумбат” амралтын газрын урд замд N.X trail маркийн Д жолоочтой автомашин онхолдож зорчигч 18-19 насны гурван хүн гэмтжээ. Тиймээс замын цагдаагийн газраас согтууруулах ундааны зүйл хэрэглэсэн үедээ автомашин жолоодохгүй байх, замын хөдөлгөөнд оролцохгүй байхыг санууллаа.