Туркийн Анталия хотноо жүдо бөхийн гран при ангиллын тэмцээн болж өндөрлөлөө. Өчигдөр тэмцээний сүүлчийн өдөр хүнд жингийнхэн барилдаж, манай хоёр бөх алт, хүрэл медаль хүртлээ.

Эрэгтэйчүүдийн 90 кг-д хүч үзсэн Г.Алтанбагана финалд Тажикстаны бөх Устпорийон Комроншохтай барилдаж, сүүлчийн 6 секундэд базари үнэлгээ авснаар ялж, алтан медаль хүртлээ. Манай бөх энэ өдөр дөрөв ялж, алтан медалийн тавцанд зогссон юм.

Тэгвэл эмэгтэйчүүдийн +78 кг-д барилдсан Б.Мөнхтуяа дөрвөн Турктэй барилдаж, гурвыг нь ялснаар хүрэл медалийн тавцанд зогссон юм. Манай бөх эхний хоёр тойрогт Туркийн бөхчүүдийг ялсан ч хэсгийн аваргын төлөө Саяит Кайраг бараагүй. Харин хүрлийн төлөө Акбулут Себилетэй тулж, базари үнэлгээгээр ялснаар медалийн тавцанд зогссон юм.

Ийнхүү Анталиягийн гран при тэмцээнд манайхаас 11 тамирчин оролцож, зургаа нь медалийн тавцанд зогслоо. Мөн нэг алт, таван хүрэл медальтайгаар багийн дүнгээр тавдугаар байрт шалгарсан юм.