Монголдоо ганцхан гэж хэлж болох хөгжлийн бэрхшээлтэй хүүхдүүдийн 29 дүгээр тусгай сургуулийн сурагчид хичээлдээ суухгүй, эсэргүүцэл илэрхийлээд багагүй хугацаа өнгөрөөд байна.

Тодруулбал, багш нар нь мэргэжлийн бус, дохионы хэлээр хичээл заадаггүй, биднийг байнга дарамталдаг зэрэг шаардлага тавьж жагссан юм. Уг асуудалтай холбогдуулан салбар яамнаас ажлын хэсэг гарсан ч өнөөдрийг хүртэл асуудлыг судлаж байгаа гэсэн шалтгаанаар хойшлуулаад байгаа юм.

Боловсролын дэд сайд Ё.Отгонбаяр тусгай сургуулийн сурагчид дунд сургуулиа төгсөхдөө дохионы хэлээр бус өөрсдөө ярьж сураад төгсөх ёстой хэмээн даапаалсан хариулт өгсөн нь нийгмийн сүлжээнд шүүмжлэл дагуулаад байгаа билээ.

Тусгай сургуульд сурдаг, төрөлхийн хэлгүй, сонсголгүй хүүхдүүдийг хэрхэн яаж ярьж сургах гээд байгааг олон ч иргэд шүүмжилсэн. Тэгвэл өнөөдөр 12.00 цагт MN мэдээллийн төвд Нийслэлийн 29 дүгээр тусгай сургуулийн багш, сурагчид цаг үеийн асуудлаар мэдээлэл хийхээр болжээ.

Сурагчид сүүлийн үед үүсээд байгаа нөхцөл байдлынхаа талаар багш нартайгаа хамтарч олон нийтэд мэдээлэл өгөхөөр болсон аж.