Манай улсад гадаадын иргэд ажил хөдөлмөр эрхлэхээс гадна их, дээд сургуульд элсэн суралцдаг. Тэгвэл эдгээр иргэдэд Гадаадын иргэн, харьяатын газрын Хяналт шалгалтын газраас ээлжит хяналт, шалтгалт хийсэн байна. Тус шалгалтад боловсролын чиглэлээр үйл ажиллагаа явуулж буй их дээд сургууль, сургалтын төвүүдэд хөдөлмөр эрхэлж, суралцаж буй гадаадын иргэд хамрагджээ.

Тодруулбал, Улаанбаатар хотын хэмжээнд үйл ажиллагаа явуулдаг 67 байгууллагын 35 орны 783 иргэн шалгалтанд хамрагдсан аж.

Гадаадын 783 иргэний 49.5 хувь нь хөдөлмөр эрхлэгч, 36.1 хувь суралцах, мэргэжил дээшлүүлэхээр оршин суух зөвшөөрөлтэй байсан байна.

Харин үлдсэн хувь нь хөрөнгө оруулагч, сайн дурын ажилтан, албан хэрэг, хувийн болон гэр бүлийн гишүүнээр Монгол Улсад оршин суух зөвшөөрөлтэй гадаадын иргэд байсныг тогтоожээ.

Түүнчлэн шалгалтын явцад Монгол Улсад оршин суух зөвшөөрлийн хугацаа хэтрүүлсэн зөрчилтэй гурван орны зургаан иргэнийг илрүүлсэн гэнэ. Зөрчил гаргасан иргэдэд Гадаадын иргэний эрх зүйн байдлын тухай хуулийн  дагуу Монгол Улсаас албадан гаргах хүртэл арга хэмжээ авахаар болсон байна.